Previous Next

Ази Номхон далайн орнуудын ухаалаг үнэмлэхийн холбооноос зохион байгуулсан Иргэний цахим үнэмлэхийн талаарх Засгийн газар хоорондын IX дэх удаагийн чуулга уулзалтад оролцоод ирлээ

Иргэний цахим үнэмлэхийн талаарх Засгийн газар хоорондын IX дэх удаагийн чуулга уулзалт энэ оны 11 дүгээр сарын 27-28-ны өдөр БНХАУ-ын Хонконг ЗЗОБ-д зохион байгуулагдсан бөгөөд энэ уулзалтад тус газрын төлөөлөгчид амжилттай оролцоод ирлээ.

Иргэний цахим үнэмлэхийн талаарх Засгийн газар хоорондын чуулга уулзалт нь 2002 оноос хойш жил бүр уламжлал болгон зохион байгуулагддаг Ази дахь энэ салбарын хамгийн том чуулга уулзалт юм.

Энэ удаагийн чуулга уулзалт “Иргэний цахим үнэмлэхийн хөгжлийн дараагийн үе: онлайн бус горимоос онлайн үйлчилгээнд шилжих нь” сэдвээр явагдсан бөгөөд Герман, Эстони, Малайз, Индонези, Афганистан, Камбож, Нигер, Өмнөд Африк, Энэтхэг, Сингапур, Бангладеш, Шри-Ланк, Египет, Хятад, Филиппин, Монгол зэрэг 25 улсын төрийн болон цахим үнэмлэхийн салбарт үйл ажиллагаа эрхлэгч компанийн 100 гаруй төлөөлөгчид оролцож санал бодлоо солилцов. Чуулга уулзалтын эхний өдөр Нигер, Афганистан, Камбож болон Энэтхэг Улсын төлөөлөгчид одоо хэрэгжүүлж байгаа болон хэрэгжүүлэхээр төлөвлөж байгаа цахим үнэмлэхийн төсөл, тулгарч байгаа хүндрэл бэрхшээлийн талаар танилцуулсан бол Эстони Улс цахим үнэмлэхийн чиглэлээрх өөрийн туршлагаасаа хуваалцсан юм. Нигер, Энэтхэг Улс нь одоогоор иргэдийнхээ биометрик өгөгдлийг бүртгэж байгаа бол Афганистан Улс “Иргэний цахим үнэмлэх төсөл”-өө хэрэгжүүлж эхлэхээр төлөвлөн ажиллаж байна. Камбож Улс иргэддээ цахим үнэмлэх олгож дууссан боловч одоогоор цахим үнэмлэхийг хэрхэн таних, бусад үйл ажиллагаатай холбох асуудал нь шийдэгдээгүй байна. Монгол Улсын хувьд 16 ба түүнээс дээш насны иргэдээ шинэчилсэн бүртгэлд хамруулж иргэний цахим үнэмлэхээ ашиглан хоёр ч удаагийн сонгуулийг зохион байгуулснаараа бусад улсаас давуу байсан боловч иргэний цахим үнэмлэхийн хэрэглээг хөгжүүлэн бусад үйлчилгээтэй холбох талаар анхааран ажиллах шаардлагатай нь харагдаж байлаа. Тус чуулга уулзалтын бас нэгэн оролцогч болох Малайз улс нь 2001 онд олон үйлдэлт цахим үнэмлэх нэвтрүүлж эхэлсэн бөгөөд цахим иргэний үнэмлэхийн чипэнд интернэт орчинд иргэнийг танилт хийх нийтийн болон хувийн түлхүүр үгний бүтцийг суулгаж өгөөгүй байна. Иргэдэд цахим үнэмлэх дээр суурилан үйлчилгээ үзүүлэхдээ тусгай програмчилсан зөөврийн төхөөрөмжийг ашиглаж байна. Энэ нь үйлчилгээ үзүүлэх нэгж тус бүр дээр дээрх төхөөрөмжийг ашиглана гэсэн үг юм. Харин Эстони улсын хувьд интернэтэд суурилсан үйлчилгээндээ түлхүү анхаарч нийтийн болон хувийн түлхүүр үгний хөгжлийн дараагийн шат болох /mobile eID/ системийг амжилттай нэвтрүүлсэн байна. Энэ нь тус улсын сонгуулийн насны иргэдийн 30 орчим хувь нь интернэтээр болон mobile eID ашиглан сонгуулиа өгснөөр харагдаж байсан юм.

ХАРИЛЦАХ

Засгийн газрын хэрэгжүүлэгч агентлаг - Улсын бүртгэлийн ерөнхий газар 14171 Улаанбаатар хот, Сүхбаатар дүүргийн 7-р хороо
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт