Previous Next

Тайланд Улсын Банконг хотноо зохион байгуулагдсан уулзалтанд тус газраас оролцлоо

НҮБ-ийн Ази, Номхон далайн бүс нутгийн Эдийн засаг, нийгмийн комисс /ESCAP/, НҮБ-ийн Хүүхдийн сан /UNICEF/, НҮБ-ийн Хөгжлийн хөтөлбөр /UNDP/, НҮБ-ийн Дүрвэгчдийн агентлаг /UNHCR/, НҮБ-ийн Хүн амын сан /UNFPA/, Дэлхийн эрүүл мэндийн байгууллага /WHO/ , Азийн хөгжлийн банк /ADB/ зэрэг олон улсын байгууллагаас хамтран “Get everyone in one picture” буюу “Хүн бүрийг нэг зурганд” уриан дор Тайланд Улсын Банконг хотноо зохион байгуулсан Ази, Номхон далайн улс орны Иргэний бүртгэл, хүн амын үндсэн бүртгэлийн статисикийн чуулга уулзалтанд тус газрын Иргэний бүртгэлийн газрын Иргэний бүртгэл, статистикийн хэлтсийн улсын ахлах бүртгэгч Д.Отгонжаргал амжилттай оролцоод ирлээ.

Чуулга уулзалтын зорилго нь “Иргэний бүртгэлийн талаарх бүс нутгийн үйл ажиллагааны төлөвлөгөө” болон “Тунхаг бичиг”-ийн төслийг хэлэлцэж, ирэх арваннэгдүгээр сард болох Ази, Номхон далайн бүс нутгийн Сайд нарын дээд хэмжээний уулзалтаар батлуулах явдал юм. Тиймээс тус уулзалтаар бүс нутгийн 33 улсын бүртгэлийн байгууллагын төлөөлөгчид оролцож, Ази, Номхон далайн улс орнуудын иргэний бүртгэлийн тогтолцоо, тэдний өмнө тулгарч байгаа асуудал, түүнийг хэрхэн шийдвэрлэсэн талаар харилцан туршлага судалж, тунхаг бичиг болон үйл ажиллагааны төлөвлөгөөний төсөл нь гишүүн орны эрх зүйн зарчимд нийцэж байгаа эсэхийг нягталж, гишүүдийн гаргасан санал хүсэлтийг баримт бичгийн төсөлд тусган улмаар бүс нутгийн хэмжээнд 2024 он хүртэлх хугацаанд мөрдлөг болгох баримт бичгийн төслийг хэлэлцсэний дүнд Ази, Номхон Сайд нарын дээд хэмжээний чуулганд өргөн барихаар болжээ. Иргэний бүртгэлийн талаарх бүс нутгийн үйл ажиллагааны төлөвлөгөөгөөр Төрсний болон нас барсны бүртгэлийн тогтолцоог боловсронгуй болгох, Төрсний болон нас барсны бүртгэлд хамрагдвал зохих бүх иргэдийг бүртгэж, баримт бичиг олгох замаар иргэний үндсэн эрхийг хангах, Иргэний бүртгэл, мэдээлэлд тулгуурлан үнэн зөв, бүрэн, цаг хугацааны давтамжтай статистик тоо мэдээ гаргах гэсэн гурван үндсэн зорилтыг дэвшүүлсэн байна. Энэхүү зорилтыг хэрэгжүүлэх зарчим, зорилго, үйл ажиллагааны хүрээ, хэрэгжилтийн үе шат, хэрэгжилтэнд хяналт шинжилгээ хийх, үр дүнг тооцох, тайлагнах зэрэг асуудлыг төсөлд тусгажээ. Уг баримт бичгийг баталснаар Монгол Улс нь иргэний бүртгэлийн тогтолцоог боловсронгуй болгох чиглэлээр НҮБ-ын өмнө үүрэг хүлээнэ. Тухайлбал, 2024 он гэхэд нас барсан бүх иргэдийн нас барсны шалтгааныг дэлхийн эрүүл мэндийн байгууллагын баталсан олон улсын өвчний стандартын дагуу код бичигдсэн эмнэлэгийн байгууллагын гэрчилгээг үндэслэн бүртгэх, 2024 он гэхэд Монгол Улсын нутаг дэвсгэрт амьдарч байгаа төрсний гэрчилгээ авбал зохих иргэдийн 90 хувь нь бүртгэгдсэн байх зэргээр тусгажээ. НҮБ-аас бодлогын баримт бичгийн хэрэгжилтэнд үе шаттай дүн шинжилгээ хийх бөгөөд 2015, 2024 онуудад тус тус хийхээр төлөвлөсөн аж. Чуулга уулзалтын үеэр Ази, Номхон далайн бүс нутгийн Эдийн засаг, нийгмийн комиссын судалгаагаар тус бүс нутагт 5-аас доош насны 130 сая хүүхэд төрсний бүртгэлд хамрагдаагүй, 10 нас баралт тутмын нэг нь бүртгэлийн алдаа зөрчилтэй гэж гарсан байна. Энэхүү байдлыг өөрчлөн иргэн бүрийг бүртгэлд хамруулах замаар хүний эрх, эрх чөлөө /сурч боловсрох, эрүүл мэндийн туслалцаа авах, нийгмийн халамжийг хүртээх/ , тэгш байдлыг хангахад дээрх бодлогын баримт бичгийг батлахын ач холбогдол оршиж байгааг тус байгууллагаас цохон тэмдэглэжээ.

ХАРИЛЦАХ

Засгийн газрын хэрэгжүүлэгч агентлаг - Улсын бүртгэлийн ерөнхий газар 14171 Улаанбаатар хот, Сүхбаатар дүүргийн 7-р хороо
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт