Previous Next

Бүгд найрамдах Эстони улсын Цахим нотариатын үйл ажиллагаатай танилцаж, туршлага судаллаа

Хууль зүйн салбарын үйлчилгээг сайжруулах, нотариатын болон хөрөнгийн эрхийн бүртгэлийн эрх зүйн орчныг сайжруулах, Эстони улсад нэвтрүүлсэн цахим нотариат, цахим бүртгэлийн үйл ажиллагаатай танилцах, туршлага судлах зорилго бүхий уг сургалтанд Хууль зүйн яам, УБЕГ, Монголын нотариатчдын танхмын төлөөллүүд оролцож Эстони улсын эрх зүйн шинэчлэл, цахим нотариат, цахим бүртгэлийн үйл ажиллагаатай газар дээр нь танилцаж, туршлага судалсан юм.

Энэхүү сургалт, танилцах аялал нь Улсын бүртгэлийн эрх зүйн шинэтгэл, тэр дундаа хөрөнгийн эрхийн улсын бүртгэлийн эрх зүйн орчныг сайжруулах, иргэдэд төрийн үйлчилгээг шуурхай, хүртээмжтэй хүргэх, иргэний эрх зүйн туслалцааг үр өгөөжтэй болгох зорилгоор бүртгэлийн хуулийн төсөл боловсруулж, өргөн хүрээтэй хэлэлцүүлэг өрнүүлж байгаа энэ цаг үед зохиогдсоноороо ихээхэн ач холбогдолтой болсон байна. Эстони улс нь эрхийн улсын бүртгэлийн цахим мэдээллийн системийг 2003 оноос нэвтрүүлж эхэлсэн эхэлсэн бөгөөд 2010 оноос цахим нотариатад шилжсэн. Цахим бүртгэлийн систем бий болгосноор бүртгэлийн байгууллага дээр иргэд биеэр ирэх шаардлагагүй болжээ. Өөрөөр хэлбэл эрх зүйн болон сүлжээ, системийн хувьд төрийн байгууллагууд болон иргэдэд үйлчилдэг нотариат, банк гэх мэт хувийн хэвшлийн байгууллагууд мэдээллийн нэгдсэн сүлжээнд холбогдох боломжийг бүрдүүлж өгсөн байна. Энэ нь бүх төрлийн үйлчилгээг цахимжуулж хялбарчлаад зогсохгүй олон нийт мэдээлэл олж авах, үнэн бодитой мэдээлэлд тулгуурлаж эрх зүйн харилцаанд орох нөхцлийг бүрдүүлсэн сайн шийдэл болсон гэж үздэг юм байна. Монгол улс ч дэлхий нийтийн энэ чиг хандлагад төрийн үйлчилгээг нийцүүлэх асуудал тулгамдаж байгаа бөгөөд Засгийн газрын 2012-2016 оны үйл ажиллагааны хөтөлбөрт цахим бүртгэлд шилжих зорилт тусгагдаж улмаар уг ажлын хүрээнд Эд хөрөнгийн эрхийн улсын бүртгэлийн тухай хуулийн төсөл бэлтгэсэн явдал юм. Хуулийн төсөлд цахим бүртгэл хийх эрх зүйн орчин, эрхийн бүртгэлийн нэгдсэн мэдээллийн санд нотариат, банк санхүүгийн байгууллагууд мэдээллээ нийлүүлэх, өмчлөгч өөрийн эрхийн бүртгэлийн мэдээллийг онлайнаар шууд авах, бүртгэлийн хураангуй мэдээлэл нийтэд нээлттэй байх зэрэг зарчмын өөрчлөлтүүдийг тусгаад байгаа юм. Мөн АНУ-ын Мянганы сорилтын сангийн Хөрөнгийн эрхийн төслөөр Нийслэл, 8 аймгийн эд хөрөнгийн эрхийн улсын бүртгэлийн архивын баримтыг цахимжуулж Эрхийн бүртгэлийн цахим систем бий болгосон нь цахим бүртгэлд шилжих боломжийг нээж өгсөн.

ХАРИЛЦАХ

Засгийн газрын хэрэгжүүлэгч агентлаг - Улсын бүртгэлийн ерөнхий газар 14171 Улаанбаатар хот, Сүхбаатар дүүргийн 7-р хороо
Ажлын цаг : Даваа - Баасан гариг, 8.30 - 17.30 цаг
Бямба, Ням амарна.
Утас : 1800-1890 /энгийн утасны тарифаар/
И-мэйл хаяг : contact@burtgel.gov.mn
Вэб сайт : http://burtgel.gov.mn

Хайлт